Zəngilan məktəbində mina təhlükəsinə dair interaktiv təlim keçirilib
2024
Zəngilan məktəbində mina təhlükəsinə dair interaktiv təlim keçirilib
Abşeron rayonunun Masazır qəsəbəsində məcburi köçkünlərin müvəqqəti məskunlaşdıqları “Zəngilan” şəhərciyində məktəblilər üçün mina təhlükəsizliyinə həsr olunmuş maarifləndirici tədbir keçirilib.
Diasporla İş üzrə Dövlət Komitəsinin, Qaçqınların və Məcburi Köçkünlərin İşləri üzrə Dövlət Komitəsinin və Niderlandın “Mine Mark” Fondunun birgə təşkilatçılığı ilə baş tutan tədbirdə Şərqi Zəngəzur Regional Təhsil İdarəsinin tabeliyindəki Zəngilan rayonu 33 nömrəli tam orta məktəbin şagirdləri iştirak ediblər.
Təlim çərçivəsində məktəblilərə mina və partlamamış hərbi sursatların növləri, xarakteri, minalanmış və minalardan təmizlənmiş ərazilərdə davranış qaydaları, aidiyyəti üzrə müraciət qaydaları ilə bağlı məlumatlar verilib, məktəblilərin prosesi daha yaxşı qavramaları üçün interaktiv yarışlar-oyunlar keçirilib.
Üç hissədən ibarət təşkil edilən tədbirin ikinci hissəsində məktəbliləri maraqlandıran suallar cavablandırılıb, onların oyunla bağlı təklifləri dinlənilib.
Təlimin sonunda məktəblilərə dəftərxana ləvazimatları hədiyyə edilib, “Məcburi köçkünlər üçün mina təhlükəsizliyi” maarifləndirici broşürləri paylanıb, mövzu ilə bağlı nəzəri biliklər verilib. Bununla yanaşı, onlar Böyük Qayıdışa dair I Dövlət Proqramının icrası çərçivəsində mina təmizlənməsi prosesi və görülən işlər barədə də məlumatlandırılıblar.
Qeyd edək ki, Diasporla İş üzrə Dövlət Komitəsi və “Mine Mark” Fondu arasında bir neçə ildir ki, ölkəmizdə mina təhlükəsizliyi mövzusunda maarifləndirmə işlərinin aparılması istiqamətində əməkdaşlıq davam etdirilir. Əməkdaşlıq çərçivəsində Diasporla İş üzrə Dövlət Komitəsinin dəstəyi ilə mina təhlükəsizliyi mövzusunda təlimlərin və maarifləndirmə işlərinin həyata keçirilməsi əyani vəsaitlərlə təmin edilir. Fond tərəfindən Bakıda və bir sıra regionlarda həyata keçirilən layihənin işğaldan azad edilmiş ərazilərdə fəaliyyətə başlayacaq məktəblərdə də icrası nəzərdə tutulub.
FOTO QALEREYA
dostların arasında bunu ilk tövsiyyə edən sən ol
DIGƏR XƏBƏRLƏR
kaynak:https://diaspor.gov.az/az/news-detail/zengilan-mektebinde-mina-tehlukesine-dair-interaktiv-telim-kecirilib-4062