Londondakı “Azərbaycan Evi”ndə 20 Yanvar şəhidləri yad edilib
, 2024
Londondakı “Azərbaycan Evi”ndə 20 Yanvar şəhidləri yad edilib
London şəhərində yerləşən “Azərbaycan Evi” Mədəniyyət və Dostluq Mərkəzində 20 Yanvar faciəsinin 34-cü ildönümü ilə əlaqədar anım tədbiri keçirilib.
Mərkəzin təsisçisi və rəhbəri Əli Tekin Ataların təşəbbüsü ilə baş tutan tədbirdə diplomatik korpusun nümayəndələri, Azərbaycan icmasının üzvləri və ölkəmizin dostları iştirak ediblər. Öncə 20 Yanvar şəhidlərinin və qurbanlarının xatirəsi bir dəqiqəlik sükutla yad edilib, ardınca Azərbaycanın Dövlət Himni səsləndirilib.
Tədbiri giriş sözü ilə açan Əli Tekin Atalar sovet imperiyası tərəfindən 34 il öncə Bakıda törədilmiş 20 Yanvar faciəsinin bütün türk dünyasını sarsıtdığını, bu amansız hərbi cinayətin Azərbaycanın müstəqilliyi yolunda dönüş nöqtəsi olduğunu vurğulayıb. Azərbaycanın ərazi bütövlüyünün tam bərpa edilməsini böyük tarixi hadisə adlandıran mərkəz rəhbəri bu nailiyyəti bütün türk dünyasının qələbəsi kimi qiymətləndirib.
Britaniya Azərbaycanlıları Cəmiyyətinin sədri Fəridə Pənahova, gürcü əsilli tədqiqatçı Tamara Draqadze və britaniyalı jurnalist Neil Vatson çıxışlarında həmin günlə bağlı xatirələrini və Bakıdakı Şəhidlər Xiyabanını ziyarət zamanı keçirdikləri hissləri bölüşüblər. Qərbdə “islahatçı” kimi tanınan Mixail Qorbaçovun 20 Yanvar hadisələrinin sifarişçisi, dünyada Azərbaycanla bağlı yalnış fikirlərin mövcud olduğu yada salınıb.
Sonra 20 Yanvar faciəsindən bəhs edən qısametrajlı sənədli film nümayiş etdirilib. Bu film Kanadada fəaliyyət göstərən ELTV media qrupu ilə “Vətən” Azərbaycan İncəsənət və Mədəniyyət Mərkəzinin birgə təşkilatçılığı ilə “History of Azerbaijan” layihəsi çərçivəsində hazırlanıb.
Tədbir Azərbaycan icmasının üzvü Babək Bəxtəvərin sazda ifasında həzin Azərbaycan musiqisinin səsləndirilməsi ilə başa çatıb.
FOTO QALEREYA
dostların arasında bunu ilk tövsiyyə edən sən ol
DIGƏR XƏBƏRLƏR
kaynak:https://diaspor.gov.az/az/news-detail/londondaki-azerbaycan-evi-nde-20-yanvar-sehidleri-yad-edilib-4126