Haaqada “Azərbaycan qadını kimdir?” mövzusunda tədbir keçirili
2024
Haaqada “Azərbaycan qadını kimdir?” mövzusunda tədbir keçirilib
Azərbaycan Respublikası Diasporla İş üzrə Dövlət Komitəsinin və Azərbaycan Respublikasının Niderland Krallığındakı Səfirliyinin dəstəyi, Benilüks Azərbaycanlıları Konqresinin (BAK) təşkilatçılığı ilə “Azərbaycan qadını kimdir?” mövzusunda tədbir keçirilib.
Tədbirdə Niderlandda yaşayan və fəaliyyət göstərən Azərbaycan, Niderland, Türk, Latviya, Ukrayna, Polşa və digər ölkələrin cəmiyyət və icma üzvləri iştirak ediblər.
Azərbaycan Respublikasının Səfirliyində təşkil olunmuş tədbirin əvvəlində Dövlət Himni səsləndirilib, şəhidlərin əziz xatirəsi bir dəqiqəlik sükutla anılıb. Holland və Azərbaycan dillərində baş tutan tədbirin moderatorluğunu və tərcüməçiliyini BAK-nin sözçüsü Lamiyə Babayeva edib.
Açılış nitqində Benilüks Azərbaycanlıları Konqresinin sədri Elsevər Məmmədov iştirakçıları salamlayıb, Azərbaycan cəmiyyətində qadının xüsusi yeri və mövqeyi haqqında danışıb. Azərbaycanın Birinci vitse-prezidenti Mehriban Əliyevanın ictimai-siyasi fəaliyyətinin Azərbaycan qadınına bir nümunə olduğunu vurğulayıb.
Azərbaycan Respublikasının Niderland Krallığındakı fövqəladə və səlahiyyətli səfiri Rəhman Mustafayev çıxışında Şərq aləmində qadının səsvermə hüququnu ilk dəfə məhz Azərbaycanda, 1919-cu ildə Xalq Cümhuriyyəti dövründə əldə etdiyini vurğulayıb. O, müasir Azərbaycan dövlətçiliyində də qadınlar tərəfindən mühüm vəzifələrin icra olunduğunu bildirib.
BAK-nin sədr müavini Sima Cəfərova Azərbaycan qadınının gücündən və nəyə qadir olduğundan bəhs edib, adı Azərbaycan tarixinə düşmüş xanımlardan söz açıb. Tomris, Sara Xatun, Məhsəti Gəncəvi, Ağabəyim Ağa, Natəvan və digər görkəmli xanımlarımızın həyat və fəaliyyəti barədə danışıb.
Daha sonra, İsveçdə yaşayan yazıçı-publisist Eluca Atalı və şair, Azərbaycan Yazıçılar Birliyinin üzvü Lətifə Nuran çıxış edərək mövzu barədə öz fikirlərini bildiriblər.
Azərbaycan Niderland Odlar Yurdu Cəmiyyətinin rəhbərinin müavini Nemətağa Əliyevin ifasında milli musiqimizdən, Niderland Krallığında yaşayan soydaşımız Təhminə Günəşin ifasında isə milli rəqslərimizdən nümunələr tədbir iştirakçılarına təqdim olunub.
Niderlandda yaşayıb fəaliyyət göstərən, Avropa ölkələrində sərgiləri təşkil olunan rəssam Vəfa Rüstəmovanın, həvəskar sənətçi Tahirə Məhəmmədin rəsm əsərləri, tərtibatçı, dizayner Vəfa Kənanqızının əl işləri də tədbir çərçivəsində sərgilənib.
Qonaqların rəğbətlə qarşıladığı tədbir maraqlı söhbətlər və mövzu barədə müzakirələrlə başa çatıb.
FOTO QALEREYA
dostların arasında bunu ilk tövsiyyə edən sən ol
DIGƏR XƏBƏRLƏR
kaynak:https://diaspor.gov.az/az/news-detail/haaqada-azerbaycan-qadini-kimdir-movzusunda-tedbir-kecirilib-4616